Ugler i mosen

Ja, her er det visst som i serien Twin Peaks: The owls are not what they seem! Det opphavlege uttrykket i dansk tyder det same som ulvar i myra, for dansk mose = norsk myr.

I dansk har det seinast tidleg på 1700-talet skjedd eit samanfall i nokre dialektar, slik at dei har sagt ulle(r) for både ulvar og ugler. Då den konkrete ulven så vart utrydda seinare på 1700-talet, vart han mindre aktuell i uttrykket òg. Ein kunne like gjerne setja inn ein g som ein v. (Likevel overlevde ulve lenge dialektalt på Jylland.)

Vi har overteke eit dansk uttrykk utan å forstå det heilt, men det høver jo godt, sidan uttrykket nettopp viser til noko mystisk. Det er vel ikkje så mange som forstår muffens heller.