Bli med på Nordisk språkmøte 2014
(3.4.14) Er du interessert i nordisk språkforståing, nordisk språkpolitikk og språka i Norden? Då bør du få med deg nordisk språkmøte i Stockholm 28.–29. august. Møtet vert arrangert av nettverket for språknemndene i Norden ved Språkrådet i Sverige og Nordisk språkkoordinasjon og er ope for alle.
Den nordiske språkdeklarasjonen blir tema for innlegg og diskusjonar på det to dagar lange språkmøtet. Sentrale problemstillingar som blir diskuterte, er:
- Kva inneheld språkdeklarasjonen?
- Kva resultat ser vi av han?
- Bør han reviderast?
- Kva blir gjort for å gjennomføre og følgje han opp?
- Kva skjer med dei fire arbeidsspørsmåla: språkforståing, parallellspråk, språkleg mangfald og Norden som eit språkleg førebilete?
Detaljert program og skjema for påmelding finn du på det svenske språkrådet sine nettsider.